Политичка злоупотреба на децата - Поднесена Претставка до Нaродниот Правобранител
Првата детска амбасада во светот – Меѓаши, Република Македонија упати претставка до г. Иџет Мемети, Народен правобранител поради политичка, партиска и воена злоупотреба на децата за агитирање и кампања од страна на деца (помали од 14 години) за влез на Македонија во НАТО. Организатор на кампањата беше Детската амбасада за сите деца во светот од Прилеп а покровител министерот за одбрана на Република Македонија г.Лазар Еленовски.
Првата детска амбасада во светот – Меѓаши поради овој типичен пример на кршење на правата на детето побара министерот Лазар Еленовски да поднесе оставка, а Детската амбасада за сите деца од Прилеп која треба да се грижи за заштита на правата на детето да се избрише од Регистерот на здруженија на граѓани и фондации.
Во прилог Ви доставуваме членови од Уставот на Република Македонија, Законот за заштита на децата и Законот за здруженијата на граѓани и фондациите, кои Првата детска амбасада во светот – Меѓаши смета дека се повредени со вклучувањето на децата во политички цели при одбележувањето на денот на АРМ, каде децата беа вклучени во агитирање и политичка кампања за влез на Македонија во НАТО со мотото “Македонија во НАТО -ние децата нивно злато“.
Спред наше мислење повредени се:
- чл. 3 од Конвенција за правата на детето
- чл. 42 од Устав на Република Македонија
Републиката посебно ги заштитува мајчинството, децата и малолетните лица.
- чл. 118 од Устав на Република Македонија
Меѓународните договори што се ратификувани во согласност со Уставот се дел од внатрешниот правен поредок и не можат да се менуваат со закон.
- чл. 9 од Законот за заштита на децата (Сл.весник бр.98/2000 од 23.11.2000 година)
Се забранува политичко или верско организирање и дејствување и злоупотреба на децата поради политичко или верско организирање и дејствување.
- чл. 3 од Законот за здруженијата на граѓани и фондациите (Сл.весник бр. 31/98 од 02.07.1998 година)
Здруженијата на граѓани и фондациите не можат да вршат политички активности или да го користат својот имот и средства за остварување на цели на политичките партии
Собранието на Република Македонија ја има усвоено Декларацијата за заштита на правата на детето од политичка манипулација и злоупотреба донесена во 1991.
Очекуваме Народниот правобранител да не информира за преземените активности.
|